நட்சத்திரமாக ஜொலிக்கலாம்!

1. கரிகாலன் முடியாது என்று நினைத்திருந்தால் தமிழ்நாட்டில் கல்லணை கிடையாது. பிரிட்டிஷ் ஏகாதிபத்தியத்தை எதிர்க்க முடியாது என்று காந்தியடிகளும், சுதந்திரப் போராட்ட வீரர்களும் நினைத்திருந்தால், நமக்கு சுதந்திரம் கிடைத்திருக்காது. சி.சுப்பிரமணியமும், எம்.எஸ்.சுவாமிநாதனும் முடியாது என்று நினைத்திருந்தால், இந்தியா உணவு உற்பத்தியில் தன்னிறைவு அடைந்திருக்காது. வர்கீஸ் குரியன் முடியாது என்று நினைத்திருந்தால், இந்தியா பால்வளத்தில் தன்னிறைவு அடைந்து இருக்காது. விக்ரம் சாராபாய் முடியாது என்று நினைத்திருந்தால் இன்று செயற்கைக்கோளை இந்தியா ஏவியிருக்க முடியாது.

‘முடியாது’ என்ற நோய் பல பேரிடம் அதிகமாக உள்ளது. முடியும் என்று நம்பும் மனிதர்களால்தான் வரலாறு படைக்கப்பட்டு இருக்கிறது. முடியும் என்ற நம்பிக்கை கொண்ட 54 கோடி இளைஞர்கள்தான், இந்திய நதிகளை இணைக்க முடியும் என்ற நம்பிக்கை கொண்ட இளைஞர்கள்தான், அனுபவத்தின் துணை கொண்டு வெற்றியைக் காண வேண்டும். நதிகளை இணைக்க வேண்டும் என்றால் என்ன வேண்டும்? ‘முடியும்’ என்ற நம்பிக்கை முதலில் ஒவ்வொரு இந்தியனுக்கும் வேண்டும்.

2. மனித நாகரிகம் வளர்ந்ததற்குக் காரணமே ‘வீரம்’தான். மனிதன் எடுத்து வைத்த ஒவ்வொரு காலடிக்கும் வீரம் தேவைப்பட்டது என்பதுதான் வரலாறு. தன்னுடைய பிரதேசத்தைக் காத்துக் கொள்ள வீரம் தேவைப்பட்டது. புதிய வாசல்களைத் திறக்க, புதிய இடங்களைத் தேடிச் செல்ல, வீரம் தேவைப்பட்டது. பழமையை மீறவும் புதுமைகள் செய்யவும் வீரம் தேவைப்பட்டது. சக மனிதனின் கண்ணீரைத் துடைத்து புரட்சிகளை உருவாக்க வீரம் தேவைப்பட்டது. மனிதநேயம் என்கிற பேனாவில் வீரம் என்னும் மையினால் எழுதப்பட்டதுதான் மனித இனத்தின் வரலாறு.

3. உறுதியும் நம்பிக்கையும் தலைமைப் பண்பும் கொண்ட நம்முடைய இளம் ஆண்களும் பெண்களும் ராணுவப் படைகளில் ஆர்வமுடன் சேர முன்வர வேண்டும் என்பது என் ஆசை. இன்றைய வேகமான அறிவியல் முன்னேற்றத்தின் காரணமாக, ராணுவத்தில் எத்தனையோ சவாலான, சுவாரசியமான வேலைகள் உருவாகி வருகின்றன. இளைஞர்களுக்கு அவை பெரும் சாகசங்களாகத் திகழும்.

4. இந்தியாவுக்கு நாம் என்ன செய்யலாம் என்று சிந்தனை செய்யுங்கள்; இந்தியாவை மேம்படுத்த வேண்டியவற்றைச் சிந்தனை செய்யுங்கள்; அமெரிக்கா, மற்ற மேலை நாடுகள் அடைந்துள்ள மேன்மைகளை நாமும் பெற என்ன செய்ய வேண்டும் என சிந்தியுங்கள். புலப்படாத எதிர்காலத்தை மட்டும் கற்பனை செய்தபடி வாழ்ந்து வருவது, ஆழமற்ற செயலாகும்.

5. உங்களால் மாற்ற முடியாதவற்றை ஏற்றுக் கொள்ளுங்கள். வாழ்க்கையில் உங்களை வரவேற்கும் சக்திகளும், அறவே எதிர்க்கும் சக்திகளும் இருக்கத்தான் செய்யும். பலனளிக்கும் ஆற்றல்கள், பயனற்ற ஆற்றல்களின் வேறுபாடுகளைத் தெளிவாகத் தெரிந்து, அவற்றுக்கு இடைப்பட்ட முறையைத் தேர்ந்தெடுக்க வேண்டும்.

6. கனவு காணுங்கள்... கனவு காணுங்கள்... கனவு காணுங்கள்... அதன்பின் கனவுகளை எண்ணங்கள் ஆக்கி, பிறகு செய்கையாக்குங்கள். பெரிதாக சிந்தனை செய்யுங்கள். நமது தேசத்தின் மக்கள்தொகை நூற்றி பத்து கோடி. ஆகவே உங்கள் சிந்தனைகள் அத்தனை மக்களுக்கும் தகுதி பெற்றதாய் அமைய வேண்டும். அப்படிச் செய்தால்தான் பெரிய அளவில் நாம் முன்னேற முடியும்.

7. இந்தியா போன்ற முன்னேறி வரும் ஒரு நாடு, விண்வெளி ஆராய்ச்சியைச் செய்து வருவதின் நோக்கம் என்ன என்று பலர் வினாவை எழுப்பி வருகிறார்கள்! இந்த முயற்சியில் நாங்கள் இரண்டு மனதில்லாமல் ஒரே சிந்தனையில் ஈடுபட்டிருக்கிறோம். வெண்ணிலவை நாடியோ, விண்கோள்களைத் தேடியோ, மனிதர் இயக்கும் விண்கப்பல் பயணத்திற்கோ முற்படும் செல்வந்த நாடுகளுடன் போட்டியிடும் பெருங் கனவு எங்களுக்கு அறவே இல்லை! ஆனால் சமூக, மனிதப் பிரச்னைகளைத் தீர்க்க முற்போக்கான விஞ்ஞானப் பொறியியல் நுணுக்கங்களைப் பயன்படுத்துவதில், உலக சமூகத்தின் முன்பாக நாங்கள் இரண்டாம் தரத்தில் இருக்க மாட்டோம்! தேசியரீதியாக அர்த்தமுள்ள ஒரு பணியை மேற்கொள்கிறோம் என்னும் அழுத்தமான உறுதியுடன் இருக்கிறோம்!

8. இமயத்தின் உச்சியை எட்டித் தொடுவதாயினும் சரி... அல்லது உங்கள் வாழ்க்கைப் பணியின் உச்சத்தை அடைவதாயினும் சரி... மேலே ஏறிச் செல்ல ஒருவருக்கு மிகுந்த மன உறுதி தேவைப்படுகிறது.

9. மாணவப் பருவத்தில் பல்வேறு தேர்வுகளை எதிர்கொள்ள வேண்டியுள்ளது. இந்தத் தேர்வு முடிவுகள் எதிர்பார்த்தவாறு அமையாவிட்டால், அதற்காக மனம் சோர்ந்துவிட வேண்டியதில்லை. தேர்வு முடிவுகள்தான் வாழ்க்கையில் இறுதியானது எனக் கருத வேண்டாம். கடவுள் நம்முடன் இருப்பாரானால், ஒருவரும் உங்களுக்கு எதிராகச் செயல்பட முடியாது. தொடர்ந்து முயற்சி செய்தால், நிச்சயம் வெற்றி கிட்டும். தற்காலிகமான பின்னடைவுக்காக மனம் சோர்ந்து போய்விட வேண்டாம்.

10. வெற்றி எப்போதுமே மகிழ்ச்சியைத் தரும். பல காரணங்களால் சில சமயம் பின்னடைவைச் சந்திக்க வேண்டியிருக்கும். இதையும் துணிவுடன் எதிர்கொள்ள வேண்டும். வாழ்க்கையில் சில எதிர்பாராத பிரச்னைகளை எதிர்கொள்வதற்கு எப்போதும் தயாராக இருக்க வேண்டும். பிரச்னைகள் நம்மை மேலாதிக்கம் செய்ய அனுமதிக்கக் கூடாது. நாம்தான் பிரச்னைகளை மேலாதிக்கம் செய்ய வேண்டும். பிரச்னைகளை தோல்வியுறச் செய்து, வெற்றி காண வேண்டும்.

நீங்கள் நட்சத்திரமாக ஜொலிக்க விரும்பினால், நீங்கள் யார் என்பது முக்கியமல்ல... உங்கள் மனம் எதை விரும்புகிறதோ, அது நிச்சயம் உங்களை வந்து சேரும்.   

- அப்துல் கலாம்